اللوجات

ماتنساش تفتح الميل بتاعك علشان هابعتلك لوجهات كل المرشحين قصدى بورتريهات كل مرشح يووووووووووووووه قصدى بوستر لكل مرشح ومرشحه-

نظام اللى يلعب بالدح مايقولش

اخونا ميمو والله انا شايف فى محمد السماك"حوت الانتخابات"تؤده وصرامه وشراسه الشاب الغيور على بلده فكما قلت لك انظر وتمعن فى نظره عينيه وشوف الجساره والتحدى اللى فيهم تمعن وشوف تركيز العين فهى ليست عيون سمك بل عيون صقر وكما انه من عمله وحرفته وامتهانه مهنه بيع السمك فهو اكثر واحد عارف بعالم النحار وهذا ما اقنعه بدخول ذلك المعترك السياسى الفج فهو من عمله بالاسماك يعلم كيف ان السمك الكبير بياكل السمك الصغير فهو يعلم تلك اللعبه وتلك الحقيقه بطبيعه تكوينه وهو ناوى ومصمم ان يكون سمكه كبيره كبيره قوى على اساس لو اتصادت تكفى عزومه لوحدها بل ولا نكذب عندما نقول انه حووووووووووووووووت-بس الملاحظ عليه انه بدا بدايه فيها تفرقه وعنصريه حيث انه بيروح بعض الجنازات ولا يذهب للبعض الاخر طبقا لاهميه عائله وبلد المتوفى فمثلا ذهب لجنازه لدى عائله الجعافره بالنخيله فى ذات اليوم والساعه كانت هناك جنازه اخرى فى باقور واخرى فى الزرابى ولم يعيرهم محمد اهتمام فهذا قد يكون من ايدلوجيته التى سيعمل بها حيث يعمل على الكم وليس الكيف فكما قلنا يعرف كيف ياكل السمك الصغير-ناس قالت معندهوش سيوله نقديه علشان يجيب عربيه ويلف بيها على تلت بلاد فى يوم واحد فالراجل التشت مالمش اليوم ده غير اللى يوديه جنازه واحده فحسبها طبعا بفكره السياسى واختار اهم واكبر جنازه فى التلاته-وقد كان دخوله للجنازه ومن وراءه اربعه انفار مثار اعجاب كل من بالجنازه ولم يستطع الكل من فرحه دخلته عليهم الجنازه اخفاء ابتسامته وضحكته المكبوته فالجعافره ولادعكا---"اما موضوع المنشور يا اخ ميمو فلا اعرف عنه شيئ حيث انك تعلم بانى بالمنتجع الصيفى وتارك البلد خوفا وطمعافياريت توضحلى مضمون وفحوى المنشور علشان نحاول الوصول لمن خلفه وهاوصل لمن نشر ذلك المنشور والله لن نتركه فى حاله اذا كان هناك افتراء ولو حتى تضمن وقائع صحيحه احنا قولنا كله بالادب-اما اخوك الدرع فيبدو فعلا انه درع ورقى وفعلا بيعمل لحساب جهه مفروضه عليه لاعتبارات اجتماعيه ونحن نقول له لك الله يا عزبه واقبلى العزاء فى درعك اللى احنا مبقناش عارفيين نفرق بينه وبين جون ستيوارت او جون مايكل قائد ومدير الحمله الانتخابيه للرئيس اوباماوللحديث والحدث بقيه

الزفارة

شكرا يا معلم صلت على مشاركانك المتميزة وحماسك الرائع. ولا اعرف كيف اعبر لك عن امتناني الشديد لتشريفك مدونتي المتواضعة بالبورتريه الجميل للسيد المرشح "محمد فاروق السماك". وعلى الرغم من امتعاض البعض من تلوث اجهزة الحاسوب لديهم بالرائحة الغير المستحبة لنائب المستقبل الا انني اجادلهم بالقول بأنه إذا كانت رائحة "الزفارة" هي الطابع المميز لهذه العركة الانتخابية فلا عجب إذاً ان يترشح لكرسي الدائرة بائع سمك ما دام المرشحون وافعالهم هي من نفس طبيعة التشت الذي يبيع فيه "محمد فاروق" السمك.

وبالعودة الى الحديث عن المرشحين وعن العركة الانتخابية ، فإنني أجد نفسي مضطراً الى التعبير عن سخطي وإدانتي لافعال البعض من المرشحين واتباعهم. فكما قال المثل "كل إناء ينضح بما فيه" فقد فاض ما بداخل هؤلاء من قباحة وسفالة فقاموا بما قد بلغ الجميع من استهداف شخص احد المرشحين بمنشور أقل ما قد يوصف به انه "قذر". لست في موقف المدافع عن هذا المرشح فهو لن يعدم من يرد عنه كيد أعداءه بالاضافة الى ان دفاعي عنه إزاء هذه الهجمة القذرة قد يعده البعض وقوفا الى جانبه ودعما له وأنا لا أدعي هنا أن لي تاثيرا يذكر إن أردت دعم هذا أو ذاك بالاضافة الى أنني ولاسبابي الخاصة لم ولن أنتخب هذا المرشح. الا ان ما يستحق الوقوف عنده هو تلك الدناءة والعفن الذي تمارس به الانتخابات في دائرتنا. الم اقل لكم انها "عركة كلاب". ان هذا المرشح في النهاية هو انسان يجب ان تحترم حياته الخاصة ويجب ان لا يتهم في شرفه وكرامته دون بينة. ان لهذا المرشح اسرة وزوجة وابناء (الله اعلم بحالهم الان). ولكن من قام بهذا العمل الشاذ لا يلقي بالاً لتلك الاعتبارات فالحرب هي بالاساس حرب قذرة ودناءة الاساليب فيها هي بالضبط كدناءة الغاية منها. فمن ينشد الكرسي طمعاً في النفوذ والمال والسلطة لن يهتم كثيرا بتلويث سمعة الناس والخوض في أعراضهم ، ومن يرغب في الحصانة لاهثاَ وراء بادج المجلس على سياراته وسيارات المقربين منه لن يبالي بقض مضاجع اسرة لم يناصبه افرادها العداء ، ومن يجري وراء العضوية املاَ في الاتجار في التأشيرات وحمل الحقائب التي لا يعلم ما بداخلها الا الله وقرنائه من شياطين الانس لن يلقي بالا ان هو أساء لزوجة او لابن لم يقترفا جريمة الا ترشح رب اسرتهم في الانتخابات.

اول المفاجات واول من اراد كسر حكر ال ابو عقرب وال ابوعيله-اول من حب يقول اقف انتبه ابوتيج فيها ناس تستحق الكرسى غيركم فهو من الشباب الذين ينطبق عليهم قول المولى عز وجل"انهم فتيه امنوا بربهم فزدناهم هدى"وقوله تعالى"ان الناس قد جمعوا لكم فاخشوهم------"وفى النهايه نتمنى ان نقول لهم وما النصر الا من عند الله--فهو لم يقول توكلت على الله للسقوط-بل يقول على الله قصد السبيل-"تقدم يا محمد لا تخف ولا يوزعنك الشيطان فان مثلك يخاف الشيطان من مجاراته-شوفوا الثقه والعزيمه والتقوى اللى فى وجهه-هو نازل على لعبه واحده وهى ان الناس عندا وكرها فى باقى المرشحين هينتخبوه لكى يكيدوا الباقيين فالكل يحلم والكل يتمنى-بس عيب محمد الوحيد ان نفسه يبقى النائب علشان يقعد جنب ناس معينه ويكون من اصحاب الحظوه الشريفه ويقف على الاعتاب المباركه-كما اننا لا ننسى له وقفته فى وجه النائب احمد سعد فى لقاء مع المحافظ بالنادى الرياضى وقام باحراج النائب امام صحبه الكرام وان كنا نحب من محمد ان يكون العتاب بينه وبين احمد سعد مش على الملاء وقيل وقتها ان هناك اشخاص هم الذين اوزعوا له ان يعمل ذلك الموقف لاحراج النائب وكله بيعدى-فنحسبه على خير ان شاء الله-------انطلق ياحووووووووووووووووت

السلام عليكم شباب ابوتيج الاحباء-وعدتكم امس اننا هنحلل كل المرشحين نفسيا وايدلوجيته السياسيه والصعاب التى تواجهه والامور التى تسهل له ويعتقد انها هى مقوماته للنجاح طبعا دول بعض المرشحين ده غير اللى بيستهبلوا ونازلين كده على الله وسيدنا النبى حتى لو سالت الواحد منهم ايه مهمه مجلس الشعب او بيعمل ايه مجلس الشعب هيرد ويقولك بيعيين القرايب والاولاد وبنات الاخ وبنات الاخت وابناء الاخ وابناء الاخت فى البترول والمحكمه والضرايب واللى يقع من قعر القفه يروح الكهرباء والميه-وكمان عربيتى ولا انا شخصيا ماتفتش على اى كمين ولا المركز يقدر يدخل بيتى-هو ده كل اللى يعرفه عن عضو مجلس الشعب وواجباته وحقوقه-طبعا غصب عنهم هؤلاء الفئه البصمجيه تعتقد ان كل ده هو مجلس الشعب ماهو ماشيفش من اى عضو قبل كده الا كده تعيين القرايب والبشوات الضباط بيحترموه وبيروح المركز يشرب الشاى مع رئيس المباحث والبيه المامور من دول طبعا الاخ محمد بياع السمك ومحمد سيد نقاره والثانى شوهد امس امام احدى المنادر الشهيره طبعا لازم يجيبوه ويضحكنوا عليه شويه هيسبوه كده من غير اشتغالات ومن غير مانضحك امام المندره دول طبعا دوروا عليه بالحلاوه وبعتوا يجيبوه والسهره امبارح كانت على الاخ محمد نقاره-اما محمد فاروق السماك فده بتاعهم من زماااااااااااااااااااااااااان مزهقهم ضحك من بدرى-وهنبدا التشريح بعد شويه ونبدا بالفلاحين ولا اولاد البلد-وفى اولاد البلد نبدا بابناء العيله الواحده المترشحينقصاد بعضهم ولا نبدا باللى يعتقد نفسه امتداد لتاريخ حافل وتكمله الانجازات نبدا ذى ماتيجى كل واحد ونصيبه ماهو مافيش واحد هيعدى-وده حقنا نتعرف على مرشحنا اللذيذ الخفيف العجيب-ونحن فى انتظار النقد من اى شخص -قول رايك يااخى ولا تخف فالرب واحد ومحدش بيموت ناقص يوم من عمره

الشكل جديد والعدد بيزيد

شكرا يا ميمو والله شكل جديد وجذاب-وبكده فعلا ممكن مش هننضرب على قفانا تانى من اى مرشح او على الاقل هنعرف كل واحد اننا فاهمينه وفاهمين الاعيبه والله العظيم دول عاملين ذى الحاواه والقرود بيلاعبوا على كل حبل بس خلاص الناس والشباب الاهم جابوا اخرهم وقاريين كل افكارهم وشغل الجلا جلا-ولا هنبكى على واد البلد اللى بيحمسونا بيها كل مره ولا مافيش فلاح جاى بعبله وحمارته يدخل علينا البندر دخول الفاتحيين هو والشلاضيم بتوعه ماحنا عارفين ان كل مرشح ليه قططه التى تسبح فى فلكه ومن خداماته مستفيدين وهو من اصواتهم سايبهم يدعكوا فى خلق الله-انا ياخوانا من بكره ان شاء الله هامسكلكم مرشح مرشح وابينلكم كل خططه وافلامه يعنى هاسلمكم كل واحد كامل مكمل بسلطاته وباباغنوجه-والله يعلم انى لن اجامل ولن اتحامل لاحد على حساب اخر وكل ماعندى من معلومات عن كل مرشحه هتكون بين ايديكم علشان مايعملوش ناصحيين علينا- احنا المره دى "شباب بندرابوتيج"هنقولهم هنعدى اللى بمزاجنا لان اللى يهمنى شباب ابوتيج لكن شباب الفلاحين فدول ايدك والارض الفلاح فلاح مهما كان هيجرى على مصلحته فين ويروح يقف ويشق هدومه شكرا استاذ ميمو على تعبك ومجهودك بس الحكايه تستاهل التعب-على الاقل كل مرشح يلم تعابينوا وما اكثر هؤلاء الثعابين طبعا الكل عارف اقصد مين بس هيدخلوا الشق ان شاء الله-عايزيين تعليق الشباب وبدون تجريح ولا شتيمه علشان الاخ ميمو ينشر سلام

اي خدمة يا معلم صلت

وغلاوتك يا معلم صلت ، انا اخدت لي ييجي 4 ساعات لغاية ما حطيت عداد الزائرين علشان ما تزعلش.

هو يا استاذ ميمو مافيش عداد يبين عدد الزوار للمدونه

يا استاذ ميمو الناس عايزه تشارك بفاعليه معاك فى المدونه فيا ريت تسيبها مفتوحه علشان الكل يطلع الكيل اللى جواه-وكل اناء ينضح بما فيه-ماتحتكرش الحكايه عليك -ماهو اللى عايز يشتم ماهو قادر يعمل مدونه ويسب فيها على راحته-انت قلت شروطك للى عايز يشارك فى المدونه ان يلتزم بالاداب ويكون نقده بناء وموضوعى ومافيش عندنا هنا تخليص مواقف ولا تخليص حسابات-فكر فى الموضوع-وكمان فى ناس طالبه ان يكون المدونه adminوانت عارف انى مش جهبز ولا افهم اكتر من ان اكتب واقرا على النت بس فشوف الحكايه

والله يا اخ ميمو ياجن احنا فعلا اتعودنا ضرب على القفا -ونزعل لو كل خمس سنين مجاش واحد او اتنين يضربونا على قفانا-بس المره دى هنقاوم شويه بس اياك مننضربش تانى مع ان الغالب ان نعرى قفانا من دلوقت للعريس او العريسين الجداد او القدام يضربونا على قفانا فى شهرنوفمبر ان شاء الله انا مجهز قفايا من دلوقت------اضرب يا معلم

عوداً عوداً

عودً عوداً! وكل انتخابات وانتم بخير وصحة وسعادة ، وبارك الله لنا في كل المرشحين والمرشحات والاعضاء والعضوات ، الناجحين منهم والناجحات والساقطين كذلك والساقطات. عوداً عوداُ! والله واتنصب السيرك واتعلقت الصور ع الحيطان وعلى التوك توك ويافطات التأييد ملأت الشوارع والميادين وتسابق المتسابقون في حجز الاماكن المميزة لدعاياتهم وتفنن طالبي الجاه والسلطان في خطب ود المواطن الغلبان. عوداً عوداً! وعادت سيارات البهوات تمر في شوارع المدينة وقراها ترفع منها الايادي بالسلامات على كل جالس وماشٍ ومتسكع بالطرقات وكما قال ابن بهانة العرجة "يا بخته ويا هناه اللي يموت له ميت في الانتخابات".

كفاية عوداً لاحسن قربت أجيب اللي في بطني. فعلاً ، حاجة تقرف. يا ناس هو احنا خلاص كده مفيش عندنا مناخير نشم بيها. ماحدش قادر يقول للبهوات دول "احنا خلاص قرفنا". ماحدش في البلد دي عنده ذرة نخوة يغير بيها على نفسه ويقولهم "كفاية استنطاع واستهبال ونصب واشتغالات".

ومن عجب العجاب في امر هؤلاء البهوات ان كل منهم بلا استثناء يبدأ حملته الانتخابية باختيار كلمات وايات من القرآن والانجيل لتصبح "لوجو" يوضع على كل دعاياته الانتخابية ، فرأينا أناس يكتب الشيطان في مدح فضائحهم ومخازيهم أشعار بالفصحى والعامية يستهلون حملات النصب والضحك على ذقون الناس بكلام العلي القدير الذي هو من أفعالهم وأفعال أقربائهم ونسبائهم براء. كما يصرون أيما إصرار على أداء الصلوات الخمس في المساجد وعلى تتبع الجنازات وتصيد الافراح وحتى العقيقة مش بيعتقوها. لقد أصبحت رؤية تلك الوجوه المثيرة للاحباط ضريبة على كل المتواجدين في اي مناسبة عامة أو خاصة ، حتى أن أحد القرويين يحكي مدللا على تفاني أحدهم في خدمة الجماهير انه "ده ولو البقرة شعتي عتولد كنت الاقي ..... قصادها وعيلافيني الميه". يا أمة ضحكت من جهلها الامم.

ولكن يبقى ما يؤرقني انه ورغم كل ذكرياتنا المعفنة عن المرشحين والاعضاء ما زلنا نولي "عركة الكلاب" هذه اهتماما شديدا ربما بسبب كثافة الغبار والروائح الكريهة التي تصدر عن المتعاركين واتباعهم. ويصير عام الانتخابات عاما مثيرا لدى الفلاح والبندري. ورغم تكرار السيناريو الممل لهذه العركة الانتخابية "ليست معركة وانما عركة" الا ان الناس يصرون على تتبع حلقاتها المسلسلة بشغف الابله وحمية الجاهل وعصبية المتطرف. على إيه ناس! ارحمونا! دي العركة حامية بس المرشحين ...... . يالا.. نهايته. هنعمل ايه؟ آدي المرشحين وآدي مجايبهم.

الله يجازيك يا صلت يابن ابي الصلت. ما كنا قاعدين كافيين خيرنا شرنا وبنتفرج ونمصمص في شفايفنا. طلعتها في دماغي يا بعيد وخليتني أخش ألوش في حارة ضلمة وربنا يستر. يا عم ما كانت سيرة "خبيني" شغالة وكنا بنضحك مع شخصيات كاريكاتورية مثل المخابرات والبرزاني وبلبل والراجل الاسود اللي شكله يخوف. على الاقل ساعتها كنا هنبقى عارفين الكف اللي هيتمد علينا جاي منين ، دلوقتي حتى لو الكف بقي عيار روسي هتبقى ضربة زايغة وهيتفرق دم ميمو الغلبان بين القبائل. وبصراحة كده يا جدعان الجماعة بتوع السياسة وهز الوسط (وكل حاجة تاني تتهز) دمهم بايخ والواحد مش هيعرف يقول فيهم كلام يضحك. يعني من هنا ورايح هيتحول ميمو الجن من كاتب ساخر الى مؤلف للكوميديا السوداء.

عموما القدام قالوا "اللي يلعب بالدح مايقولش ....." احنا لا هنخاف ولا هنتهدد واللي يعرف سكة ابويا الله يرحمه يروح يقوله (يا رب كل المرشحين يعملوها). وكما كنا سنظل. سنتكلم عن ما يهم الناس ولا نخاف في الحق لومة لائم وسيظل الصدق والامانة المهنية نبراساً لكل ما نقدمه للقراء ولن تأخذنا وساخة العركة الانتخابية الى أن نحيد عن منهجنا المحايد ولا عن اسلوبنا المترفع عن البذاءات (يعني مش هنطبع منشورات وسخة زي ما بيعمل البهوات الغير محترمين في بعض). لسنا أصحاب مصلحة وليست لنا سابقة عداء مع أي مرشح ولا مقدمين على وظيفة في المحكمة ولا في الكهرباء. بس احنا ناويين نكهرب البهوات أصحاب المصالح ونحاكمهم محاكمة جماهيرية صاخبة ان شاء الله. اللهم ارنا الحق حقاً وارزقنا اتباعه وارنا الباطل باطلاً وارزقنا اجتنابه ، اللهم اعنا على المتكبرين والمتسلطين وطالبي السلطة وحرامية الوظائف. اللهم افتح بيننا وبين قومنا بالحق وانت خير الفاتحين.

ويارب استرها معانا ده احنا غلابة ومش كد الجماعة الواعرين دول.

السلام عليكم اخوانى-بجد الحكايه ابتدت تشتد والكل خلص لف حوالين التراك ونزل الملعب رسمى وفى التشكيله الاساسيه -شهدنا ورصدنا منذ مطلع هذا الاسبوع انتشار صور لمرشحى التوك توك على جوانب التوك توك مثل صور الدباح والحاجه والطاهر بن الطاهر واللى مش عارفين هو والحاجه من نفس العائله ومتوقع من ذلك تفكيك اصوات العائله المباركه ومعروف ان كل فرد فى هذه العائله عميد لحاله وكل واحد عامل انه يقوم بلد ويقعدها طيب هيعملوا ايه فى الورطه دى مع اعترافنا باحقيه الاثنين فى المقعد بس ماينفعش يعنى يسيبوا لكل عيله تانيه حاجه-هذا بخلاف الحرج والمازق الشديد الذى وضعه الحاج الطاهر لباقى افراد الاسره من اعضاء الحزب الوطنى واعضاء المجالس المحليه الممثلين للاسره بالمحليات فترشح الحاج وضعهم فى موقف غايه فى الصعوبه والحرج ووضعهم بين خيارين كلاهما مر مراره العلقم على هؤلاء الاعضاء فاما الحزب واما الاسره العتيقه فسوف تثبت لنا الايام كيف سيتصرفوا بكل حنكه ودهاء سياسى هؤلاء الاعضاء للالفاف على هذا الوضع دون ان يخسروا الحزب او العائله فهذه مناوره سياسيه سوف تثبت مدى حنكه هؤلاء واللذين كان لهم السبق فى محاوله الترشح لمجلس الشعب لولا الدواعى الامنيه فنحن نراه هذه الايام يلف ويدور ويناور باقاصى الليل وفى شوارع وحوارى جانبيه فى حديث لا يخلو من الشجون والالم من الموقف والحرج الذى هو فيه فنراه يمشى باواخر الليل ليفكر مع احد اخوته بصوت عالى فيما ممكن ان يفعلوه للخروج من المازق والايام هتثبت لنا مدى دهائه السياسى والاجتماعى ونحن ايضا من ورائه نرصد تحركاته ومناورته وننقلها لكم-للقاء

من اول الحكايه

هنبدا الحكايه من البدايه وباسلوب مختلف شويه عن اسلوب ميمو الجن لانه متمكن من ادواته لكن انا هاحاول اكون حرفى ومهنى شويه بس هيكون اسلوبى عام وكلماتى شعبيه شويه وهنلتزم بالاداب العامه العامه فى تناولنا لفاعليات الانتخابات البرلمانيه 2010فيما يخص دايرتنا الحبيبه دائره مركز ابوتيج وهنتناول اخبار كل المرشحين بحياديه تامه دون النظر الى عواطف ولا مناصب فنحن لا نخاف فى الله لومه لائم وبنقول من الان اللى على راسه بطحه هنحسسله احنا عليها وربنا يكرمنا حتى نوصل الى المشاركين والمهتمين الحقيقه كامله حتى نوصل الى الى افضل مرشحين يمثلونا بدون ما يستغلونا او يضربونا على قفانا كعاده كل الناجحين-واحنا لن نذكر اسماء صريحه بل رمزا وانتو وفطنتكم-هنشرح ابعاد كل مرشح وحياته وعمله والصعاب التى امامه والمشاكل التى يواجهها فى طريق تحقيق الحلم وزياراته وتحالفاته وايدلوجيته فى اداره المعركه الانتخابيه هنكون مراه صادقه لهذه الانتخابات المصيريه والفارقه فى مستقبل مصر-طبعا فى وجوه بتقول هترشح لكنهم لايمثلون اى ثقل او اهتمام لدى الناخبين واهالى الدائره فهؤلاء لن نتعرض لهم من قريب ولا بعيد حتى ننئا بانفسنا عن التعريض او التشهير باحد فهؤلاء واخدينها استهبال وتحقيق مكاسب خاصه على ان قال الكل سوف يجرى عليهم ويساومهم على التنازل وكسب قال اصوات مؤيديه "دول شويه نمر والله" احنا هنتناول من لهم حضور قوى على الساحه الانتخابيه ونكرر بحياديه تامه -والله من وراء قصد السبيل-سنتواصل يوميا